Kela-aašijd puáhtá tääl hoittáđ neetist meid sämikielân

Kela nettiášástâllâmpalvâlus ađai OmaKela-palvâlus lii taan räi puáhtám kevttiđ jo-uv suomâkielân teikkâ ruotâkielân. Tääl Kela lii almostittâm palvâlusâst vuosmuš versio meiddei kuulmâ Suomâst sarnum sämikieláid. Palvâlus nommâ lii tavesämikielân MuKela já aanaar- já nuorttâsämikielân MuuKela.

Sämikielâg ášástâllâmpalvâlusân puáhtá čáládâttâđ siisâ torvolávt čujottâsâst www.kela.fi valjiimáin sijđostuv uálgis paječievâst Čáládât siisâ -tedâlduv (Kirjaudu) já tast maŋa puáttee valjiittuvvâst muulsâiävtu MuuKela (OmaKela). Palvâlusân kalga tubdâttâttâđ siisâ nettipaŋkkitubdâlduvâiguin teikkâ mobiilvisásmitmáin.

Siisâ čáládâttâm maŋa äššigâs puáhtá valjiđ suu valjim sämikielâ MuuKela kielâvaljiittuvvâst. Táárbu mield äššigâs puáhtá maccâđ ášástâllâm ääigi älkkeht meiddei suomâkielâ- teikkâ ruotâkielâ uáinusân.

Sämikielâg ášástâllâmpalvâlus stivree ucâmuš já lahtosij tooimâtmist

Sämikielâg ášástâllâmpalvâlus stivree äššigâs ucâmuš já lahtosij tooimâtmist Kelan. Äššigâs väljee palvâlusâst suu halijdem hiäđu já lahta toos jieijâs rustigijn tevdum pdf-ucâmušluámáttuv. Ko ucâmuš lii vyerkkejum palvâlusân, äššigâs puáhtá lasettiđ toos taarbâšlâš lahtosijd. 

Algâmuddoost sämikielâg palvâlusâst puáhtá uuccâđ pyecceitipšom- já talhâssajanmáávsuid, vajodittem já vádulijtorjuu. Meiddei vyeliahasii aitârdeijee teikkâ Suomi.fi-váldásmitmáin nube peeleest ášástâllee puáhtá vuolgâttiđ ovdiibeln mainâšum ucâmušâid já tai lahtosijd.

Maŋeláá taan ive mittomeerrin lii rähtiđ sämikielâg palvâlusân jieijâskielâlâš ovdâsijđo já miärádâsâi já eres äššikiirjij uáinus. Tuáistáážân miärádâsah, reeivah já eres äššikirjeh puáhtá uáiniđ tuše molsomáin kielâ suomâkielân teikkâ ruotâkielân.

– Mij tuáivup sämikielâlâš äššigâsah keččâleh ášástâllâmpalvâlus kevttim, veikkâ palvâlusâst láá aanoost eskân ton vuosmuš jiešvuođah. Kevttei feeriimeh láá mijjân tuođâi teháliih, ko ovdedep palvâlus, iätá MuuKela ovdedem äššitobdee Elina Sipola.

Kela.fist uápisteh meid sämikielân ášástâllâmpalvâlus kevttimist.

Kela.fi-sijđostuvvâst muštâleh tääl ovdebáá vijđásubbooht meiddei sämikielân MuuKela kevttimist. Sijđostuvvâst muštâleh meiddei muulsâiävtulâš siisâ čáládâttâmvuovijn já váldásmitmist.

Kela.fist muštâleh meid, maht neetist puáhtá hoittáđ aašijd nube peeleest. MuuKelast puáhtá hoittáđ aašijd nube ulmuu peeleest, jis palvâlus kevttee olmooš lii olesahasâš já nubbe olesahasâš olmooš lii váldásmittám suu hoittáđ suu Kela-aašijd. Meiddei aitârdeijee puáhtá hoittáđ MuuKelast motomijd vyeliahasâš párnád aašijd.

Äššigâs finnee suu miärádâsâst sämikielâg jurgâlus

Sämikielâg äššigâs finnee hiätumiärádâsâs vist suomâkielân teikkâ ruotâkielân tom vuáđuld, mii suu aalmugtiätuvuáhádâhân merkkejum ášástâllâmkielâ lii. Ášástâllâmkiellân puáhtá valjiđ tuše suomâkielâ teikkâ ruotâkielâ.

Jis äššigâs lii uuccâm hiäđu sämikielâg ucâmuššáin teikkâ mudoi muštâlâm táátu finniđ miärádâsâs sämikielân, Kela vuolgât sunjin reivân meid miärádâs sämikielâg jurgâlus.

Eenikiellân puáhtá aalmugtiätuvuáháduvvâst almottiđ meid tave-, aanaar- teikkâ nuorttâsämikielâ. Meiddei Kela finnee tiäđu äššigâsâi eenikielâst aalmugtiätuvuáháduvvâst.

Sämmiliist lii säämi kielâlaavâ mield vuoigâdvuotâ hoittáđ Kela-aašijd jieijâs eenikieláin. Kielâlâš vuoigâdvuođâi olášume keevâtlávt váátá meid šleđgâlâš ášástâllâmmáhđulâšvuođâ faallâm.

Luuvâ eenâb

• Ášástâllâmpalvâlus MuuKela
• Siisâ čáládâttâm MuuKela-palvâlusân
• Nube peeleest ášástâllâm MuuKela-palvâlusâst
• Torvolâš ášástâllâm MuuKelast
• Sämikielâg luámáttuvah